ЭМОМАЛӢ РАҲМОН БЕШ АЗ 10 ҲАЗОР МАҲКУМШУДАГОНРО АВФ МЕКУНАД

                 Душанбе, 27 октябр. (АМИТ «Ховар», Фарангис Раҳимова).- 26 октябр, Президенти ҶТ Эмомалӣ Раҳмон ҷиҳати баррасӣ ба Маҷлиси намояндагони Маҷлиси Олии Ҷумҳурии Тоҷикистон лоиҳаи қонун «Оид ба афв»-ро, ки ба 15-солагии Конститутсияи Ҷумҳурии Тоҷикистон ва Соли бузургдошти Имом Абуҳанифа ибн Собит бахшида шудааст пешниҳод намуд.                 Аз дафтари матбуоти сардори давлат ба АМИТ «Ховар» хабар доданд, ки лоиҳаи қонун аз 25 модда иборат буда, ба гурӯҳи муайяни маҳкумон ва шахсоне, ки парвандаҳои ҷиноятияшон дар баррасии огранҳои тафтишоти ибтидоӣ ва судҳо қарор дорад равона шудааст.                 Қонуни мазкур аз рӯи ҳисоботи пешакӣ нисбат ба 10 ҳазор нафар маҳбусон татбиқ мегардад. Қонуни Ҷумҳурии Тоҷикистон «Оид ба афв» нисбати шахсоне, ки то қабули қонуни мазкур ҷиноят содир кардаанд татбиқ карда мешавад.