ГУФТУГӮИ РӮ БА РӮ БО РАИСИ ШАҲР

                  Душанбе, 3 октябр. (АМИТ «Ховар», Бекназари Абӯбакр). — Бо мақсади шиносоии бештар бо ҳолу аҳволи сокинон, ҳаллу фасли оҷилии масъалаҳои ҳаётан муҳим ва ба омма расонидани тадбирҳои Ҳукумати мамлакат дар мавриди пешбурди ҳаёти ҷамъиятию сиёсӣ, иқтисодию иҷтимоӣ ва фарҳангию маънавӣ, инчунин тарғиби ғояҳои ояндабинонаи Президенти кишвар мулоқоти раиси шаҳри Хуҷанд Содиқҷон Мирхолиқов бо сокинон баргузор мегардад.                Иштирокчиёни мулоқот натанҳо бо масъалаҳои шахсӣ аз раиси шаҳр дархост ба амал меоранд, балки онҳо бештар ба масъалаҳои шаҳрдорӣ, тозагии муҳит, ободонии маҳалҳо, имкониятҳои рушди иқтисодиёт, ба кор даровардани иқтидорҳои бозмондаи истеҳсолии корхонаҳои қаламрави шаҳр ва дар ин замина имконияти бештар фароҳам овардан барои ба кори фоиданоки ҷамъиятӣ ҷалб кардани захираҳои озоди меҳнат ва муҳоҷирони меҳнатии аз хориҷи кишвар баргашта, ҳамчунин беҳдошти вазъи соҳаҳои фарҳангу маориф, нигаҳдории тандурустӣ таваҷҷӯҳ зоҳир мекунанд.                  Мавриди ёдоварист, ки то имрӯз Содиқҷон Мирхолиқов бо аҳли маҳаллаҳои «Хуҷанд», «Чорчароғ», «Масҷиди сурх», «Тути калон», «Инқилоб», «Шарқ», «Сирдарё», «Сайҳун», инчунин маҳаллаҳои ба номи Қорираҳмат Қурбонов, ба номи Содирхон Ҳофиз, минтақаҳои истифодаи манзили рақамҳои 4, 6 ва 8 мулоқот орост.