МАҲФИЛҲОИ СИМПОЗИУМИ БАЙНАЛХАЛҚӢ БАХШИДА БА ИМОМИ АЪЗАМ

                 Душанбе, 6 октябр. (АМИТ «Ховар», Кристина Эрлих). – 5 октябр баъди ба охир расидани Симпозиуми байналхалқӣ бахшида ба 1310 — солагии Имоми Аъзам дар Кохи Сомон дар мавзӯи «Мероси илмии Абӯҳанифа ва аҳамияти он дар муколамаи миллатҳо» маҳфили илмӣ баргузор гардид. Онро профессори Донишгоҳи Отатурки Туркия Башир Гузубанлӣ ифтитоҳ намуда, дар бораи ҳаёту эҷодиёт ва рӯзгори Имоми Аъзам сухан ронд.                  Дар маҳфили нахустини Симпозиум мавзӯи «Мероси илмии Имом Абӯҳанифа ва аҳамияти он дар ҷаҳони имрӯзаи ислом» мавриди баррасӣ қарор дода шуд. Дар маҳфили мазкур олимону мутахассисони мамлакатҳои гуногун, аз ҷумла, профессори Донишгоҳи Хитити Туркия Муҳити Март, раиси Шӯрои олии тақоруби мазоҳиби Эрон Оятулло Тасхирӣ, роҳбари маркази илмии «Время и Мир» — и Русия Валерий Емелянов, директори Пажӯҳишгоҳи Дунганшиносии Донишгоҳи марказии миллии Чин Чженхуа Хун ва дигарон дар мавзӯъҳои гуногуни бахшида ба фаъолияти илмӣ ва динии Имоми Аъзам маърӯзаҳо хонданд.                Имрӯз, 6 октябр дар Коҳи Сомон маҳфилҳои сеюм ва чоруми симпозиум баргузор мегарданд. Дар фарҷоми онҳо меморандуми симпозиум қабул карда мешавад.