НАҚШАИ ҶАМЪОВАРИИ АНДОЗ ИҶРО ШУД

                 Хуҷанд, 7 октябр. (АМИТ «Ховар», Санавбар Мақсудова). – Раиси шаҳри Хуҷанд Содиқҷон Мирхолиқов зимни сӯҳбат бо мухбири АМИТ «Ховар» зикр намуд, ки дар давоми 9 моҳи гузаштаи соли равон дар шаҳри Хуҷанд 20 корхонаю муассисаи фарҳангӣ ва иҷтимоию маишӣ ба истифода дода шуд.                   Дар ин давра ба муносибати 12 – солагии ҷашни Ваҳдати миллӣ дар шаҳр корхонаи муштараки Тоҷикистону Эрон – «Хуҷанд – Нику» ба кор даромад. Дар маросими ифтитоҳи он Президенти ҷумҳурӣ Эмомалӣ Раҳмон иштирок дошт. Ба туфайли ба кор даромадани корхона 250 нафар бо кори доимӣ таъмин карда мешаванд. Умуман, дар давоми 9 моҳи гузашта дар шаҳр 7,5 ҳазор ҷойи нави корӣ муҳайё карда шуд.                   С.Мирхолиқов афзуд, ки дар Хуҷанд фаъолияти ҷамъияти саҳомии «Сано» дубора ба роҳ андохта шуд. Дар натиҷа дар ин ҷо сад нафар бо кор таъмин шуд.                    Ташкили корхонаҳои нав ва ба кор андохтани корхонаҳои азкормонда сабаби афзоиши истеҳсоли мол ва ғанитар гардидани хазинаи давлат мебошанд. Дар давоми 9 моҳи гузашта корхонаҳои саноатии Хуҷанд ба маблағи 176,9 миллион сомонӣ маҳсулот бароварданд. Аз ин ҳисоб қисми даромади буҷети давлат ба андозаи 132,9 фоиз иҷро шуд. Дар натиҷаи барзиёд иҷро шудани нақшаи ҷамъоварии андоз ба ҳисоби буҷет зиёда аз нақша 19,5 миллион сомонӣ гузаронида шуд, — гуфт дар хотима С.Мирхолиқов.