НАМОИШНОМАИ ЯКҶОЯИ ҲУНАРМАНДОНИ ТОҶИКУ АФҒОН

                Душанбе, 16 октябр.(АМИТ «Ховар», Таҳмина Ғоибназарова). – Гурӯҳи эҷодии Театри давлатии ҷавонон ба номи Маҳмудҷон Воҳидов, пас аз сафар ба Фестивали байналмилалии театрии Кобул , ба Тоҷикистон баргашт.                  Тавре ба АМИТ «Ховар» директори Театри ҷавонон Саид Абдуллоев иттилоъ дод, ҳайати эҷодии театр барои ҳакамону тамошобинон ва мухлисони Фестивали Кобул намоишномаи «Чашмони азалии бародар» — ро дар таҳияи коргардони шинохта Мирзоватан Миров пешниҳод карданд. Намоишнома драмаи классикӣ буда, дар он фаҳмиши фалсафӣ доир ба моҳияти инсон таҷассум ёфтааст. Намоишнома аз ҷониби иштирокчиёни Фестивал ва бинандагони Афғонистон самимона истиқбол карда шуд.                 «Хурсандиовар аст, ки дар рафти Фестивал намояндагони сафорати Ҷумҳурии Тоҷикистон ва дигар ҳамватанони дар ин кишвар қарор дошта, моро дастгирӣ мекарданд,» — гуфт Саид Абдуллоев.                   Тавре С.Абдуллоев илова кард, дар хотимаи Фестивал аз ҷониби Маркази фарҳангии Афғонистон даъват ба амал оварда шуд, ки ҳунармандони театри ба номи Маҳмудҷон Воҳидов дар якҷогӣ бо актёрони афғон намоишномаи нав ба саҳна гузоранд. Бо ин мақсад то охири сол 5 нафар актёрони тоҷик аз театри мазкур ба Кобул мераванд. Айни ҳол сенарияи спектакл муайян карда нашудааст. Дар назар дошта мешавад, ки намоишномаи таҳияшуда ҳам завқи тамошобини Афғонистон ва ҳам ба завқи тамошобини Тоҷикистон мувофиқ бошад.