НИШАСТИ МАТБУОТӢ ДАР ФАРХОР

                  Фархор, 16 октябр. (АМИТ «Ховар», Сулаймон Холов).-Дар ноҳияи Фархор нишасти матбуотӣ бо иштироки хабарнигорони ВАО баргузор гардид. Раиси ноҳия Шариф Ғаффоров аз натиҷаҳои ҷамъбасти 9 моҳаи ноҳия ба хабарнигорон ахбор дода гуфт, ки дар 9 моҳи соли ҷорӣ истеҳсоли молҳои истеъмолии халқ ба 8940 ҳазор сомонӣ расонида шуд, ки нисбати ҳамин давраи соли гузашта 117,2 %- ро ташкил медиҳад. Инчунин дар ин давра 425 тонна равған, 6280 тонна орд, 255 тонна маҳсулотҳои нонӣ истеҳсол карда шуда, дастраси мардум гардидааст. Ш. Ғаффоров афзуд, ки бо мақсади рушди саноат, фароҳам овардани ҷойҳои нави корӣ аз тарафи ҶДММ «Корпорасияи Зиёратшоҳ» дар мавзеи Уртабуз фабрикаи ресандагии «Фаррес» бо иқтидори истеҳсолии 1000 тонна калоба дар як сол, дар ҷамоатҳои деҳоти Дарқад, Фархор, Деҳқонариқ ва Ғалаба яктогӣ сехҳои хурди коркарди маҳсулотҳои кишоварзӣ бо иқтидори солонаи ҳар кадом 60 ҳазор қуттии шартӣ сохта шуда, ба кор оғоз намудааст. Дар рафти нишаст доир ба фаъолияти кори соҳаҳои маориф, тандурустӣ, таъмини лампаҳои каммасраф, сохтмон ва оид ба дигар соҳаҳои дигари афзалиятнок хабарнигорон саволу ҷавоб намуданд. Раиси ноҳия ба ҳамаи саволҳои хабарнигорон посух дод.