ПЕШГӮИҲОИ КОРШИНОСОН ТАСДИҚ НАШУДАНД

                   Душанбе, 9 октябр. (АМИТ «Ховар», Людмила Дубинина). — «Соли 2008 вобаста ба бӯҳрони молиявии ҷаҳонӣ баъзе аз коршиносон пешгӯӣ карда буданд, ки Тоҷикистон ба мушкилоти сахти молиявӣ рӯ ба рӯ омада бӯҳрони ҷаҳонӣ ба буҷаи давлатӣ ва нишондодҳои макроиқтисодии он таъсири манфӣ мерасонад. Хушбахтона, ин пешгӯии коршиносон тасдиқ нашуд» — гуфт, муовини директори Маркази тадқиқоти стратегии назди Президенти Ҷумҳурии Тоҷикистон Сайфулло Сафаров. Ҳамчунин дар нишасти матбуотии Маркази тадқиқоти стратегии назди Президенти Ҷумҳурии Тоҷикистон оид ба масоили иҷтимоӣ, муҳоҷирати меҳнатӣ, соҳибкории хурд ва овозаҳо дар бораи тақдири минбаъдаи пойгоҳи низомии 201 – и Федератсияи Русия миёни рӯзноманигорон ва роҳбарияти Марказ муколама баргузор шуд.                    «Шумораи муҳоҷирони меҳнатӣ нисбат ба соли гузашта 30 фоиз кам шуда бошад, ҳам ин ҳолат ба сатҳи зиндагии оилаи онҳо таъсири ҷиддӣ нарасонидааст. Агар соли 2008 танҳо 13 фоизи маблағҳои муҳоҷирони меҳнатӣ барои рушди корхонаҳои хусусӣ сафарбар шуда бошад, имсол 25 фоизи даромадҳои муҳоҷирон ба харидории таҷҳизот барои таъсис додани корхонаҳои хурди истеҳсолӣ сарф карда шудааст. Соли 2010 интиқоли маблағ зиёд хоҳад шуд. 95 фоизи амалиёти интиқоли маблағ аз Русия ба воситаи бонкҳо сурат мегирад, ки ин дар навбати худ барои идораи босамари он мусоидат мекунад. Айни ҳол системаи бонкии мамлакат яке аз роҳҳои бехатар, мувофиқ ва осони интиқоли маблағ ба шумор меравад», — изҳор кард сардори раёсати Маркази тадқиқоти стратегӣ Фирӯз Саидов.                  «Овозаҳо дар хусуси дархост кардани пардохт дар ҳаҷми 300 миллион доллари амрикоӣ барои ҷойгиршавии пойгоҳи низомии 201 Русия дар қаламрави Тоҷикистон асос надоранд», — қайд кард С.Сафаров.