САРРАЁСАТИ ҚУШУНҲОИ САРҲАДИИ ТОҶИКИСТОН ИЗҲОР МЕКУНАД

                Душанбе, 17 октябр. (АМИТ «Ховар» Наталя Михайлова). – Ба АМИТ «Ховар» аз Хадамоти матбуоти Сарраёсати қушунҳои сарҳадии Кумитаи давлатии амнияти миллии Ҷумҳурии Тоҷикистон хабар доданд, ки оид ба ҳодисаи задухӯрди гурӯҳи ҷинояткор бо сарҳадбонони қирғиз «Сарраёсати қушунҳои сарҳадии Кумитаи давлатии амнияти миллии Ҷумҳурии Тоҷикистон расман изҳор мекунад, ки ҳодисаи гузаштани сарҳад аз Тоҷикистон ба Қирғизистон ва аз Қирғизистон ба Тоҷикистон ба қайд гирифта нашудааст».                Сарҳадбонон ва кормандони ниҳодҳои қудратӣ 14 октябри соли 2009 дар ноҳияи Исфараи вилояти Суғд, аз ҷумла дар наздикии хати сарҳади Тоҷикистону Қирғизистон ягон гурӯҳи ҷинояткорро пайгирӣ накардаанд ва бо ягон гурӯҳ задухӯрди мусаллаҳона анҷом надодаанд.                  Дастаи сарҳадбонони Сарраёсати қушунҳои сарҳадии КДАМ — и Ҷумҳурии Тоҷикистон дар наздикии дидбонгоҳи сарҳадии «Коктош» — и Ҷумҳурии Қирғизистон садои тирпаррониро шунида ба ҳолати тақвияти тартиботи нигаҳдории сарҳад гузашта бо сарҳадбонони қирғиз ҳамкориро барои мубодилаи ахбор ва донистани вазъияти ба амаломада ба роҳ монданд.               Айни ҳол дар ҳамкорӣ бо сарҳадбонони Ҷумҳурии Қирғизистон чораҳои фаврӣ-ҳарбӣ барои пайдо кардан, дар иҳота гирифтан ва дастгир намудани гурӯҳи ҷинояткори бо сарҳадбонони қирғиз задухӯрд анҷомдода, давом дорад. То ҳол ҳайат ва мансубияти миллии ин гурӯҳи мусаллаҳ муайян нашудааст.               Ҷониби Қирғизистон дар бораи ба тарафи Тоҷикистон гузаштани гурӯҳи мусаллаҳ маълумоти аниқ ва пурра надорад. Дар ин бора дар гуфтугӯи телефонии Сардори Ситоди марказии Сарраёсати қушунҳои сарҳадии КДАМ — и Ҷумҳурии Тоҷикистон генерал-майор Шараф Файзуллоев ва сардори Ситоди марказии Хадамоти сарҳадии Қирғизистон полковник Кубаныч Сарыбаев қайд карда шуд, — иттилоъ доданд аз хадамоти матбуоти қушунҳои сарҳадӣ.