ШУҒНОН АЗ ХОРУҒ КӮЧОНИДА МЕШАВАД

                 Душанбе, 3 октябр.(АМИТ «Ховар», Марзия Саидова).-Бо пешниҳоди Ҳукумати Ҷумҳурии Тоҷикистон, илтимосномаи Маҷлиси вакилони халқи Вилояти Мухтори Кӯҳистони Бадахшон маркази маъмурии ноҳияи Шуғнон аз шаҳри Хоруғ ба деҳаи Миденшори деҳоти Поршиневи ноҳияи Шуғнон кӯчонида мешавад.                Дар ин хусус 3 октябр дар иҷлосияи 21-уми палатаи болоии парлумони Тоҷикистон Маҷлиси миллии Маҷлиси Олии Ҷумҳурии Тоҷикистон қарор қабул кард.                  Раиси Кумитаи маҷлиси миллӣ Мӯним Холиқов зимни шарҳи ин масъала гуфт, ки мақсад аз кӯчонидани маркази маъмурии ноҳияи Шуғнон ташкил намудани маркази ягонаи маъмурӣ ва мунтазам назорат бурдан аз болои он ва фаъолияти тамоми соҳаҳо мебошад. Кӯчонидани маркази маъмурии ноҳия ба суръати рушди иқтисодию иҷтимоии ноҳия такон мебахшад. Бо супориши Президенти ҷумҳурӣ барои интихоби ҷой ҷиҳати кӯчонидани маркази ноҳияи Шуғнон гурӯҳи кории Ҳукумати Ҷумҳурии Тоҷикистон, ки ба он кормандони масъули Агентии сохтмон ва меъмории назди Ҳукумати Ҷумҳурии Тоҷикистон Ҷамъияти саҳҳомии «Гипрострой» ва мутахассисони соҳаи меъморӣ ва лоиҳакашии вилоят шомил буданд, деҳаи Миденшори деҳоти Поршиневи ноҳияи Шуғнонро интихоб намуданд.                 Деҳаи Миденшор яке аз калонтарин деҳаҳои ноҳияи Шуғнон ба шумор рафта, маркази деҳоти Поршинев аст. Он барои ҷойгир кардани маркази ноҳия мувофиқ аст. Деҳа дорои шабакаи муассисаҳои иҷтимоию фарҳангӣ ва савдою тиҷоратӣ, хизмати маишӣ ва корхонаҳои истеҳсолӣ буда, ба минатақаҳои ноҳия нисбати дигар маҳалҳо наздиктар ҷойгир аст. Инчунин, робитаи мунтазами нақлиётӣ дорад. Бо пешниҳоди Ҳукумати Ҷумҳурии Тоҷикистон маводи зарурӣ тибқи феҳрасту ҳуҷҷатҳои маълумотдиҳанда оид ба масъалаҳои сохти марзиву маъмурӣ замима шудааст.