ҲАР ЯК СОКИНИ ДЕҲОТ БОЯД КАМАШ ҲАФТ СОАТ БАРҚ ГИРАД

                 Душанбе, 10 ноябр. (АМИТ «Ховар», Фирдавс Таваров) — Тавре аз маркази матбуоти ШСХК «Барқи тоҷик» ба АМИТ «Ховар» хабар доданд, алҳол системаи энергетикии Тоҷикистон бо реҷаи автономӣ, яъне берун аз Шабакаҳои муттаҳидаи Осиёи Марказӣ ва бо иқтидорҳои худӣ кор карда истодааст.                  Дар айни замон ШСХК «Барқи тоҷик» бо маҳдудият барқ интиқол дода истодааст, вале ин маънои онро надорад, ки мардуми деҳот аз барқ бояд маҳрум карда шавад, гуфт манбаъ.                   Дар ин замина, раиси ШСХК «Барқи тоҷик» фармонеро ба тасвиб расонд, ки мутобиқи он ҳар як сокини деҳот дар як шабонарӯз бояд камаш ҳафт соат ва мактабҳои деҳот дар тамоми соатҳои таълим бо барқ таъмин карда шаванд. Дар фармони раис таъкид мегардад, ки бояд шабакаҳои барқии ноҳияҳо ҷадвали махсус таҳия намуда, аз рӯи он, барои сербор нашудани таҷҳизот ва хатҳои интиқолӣ, сокинони маҳалҳои аҳолинишинро дар соатҳои муайян барқ диҳанд. Дар баробари ин, қарздорон пурра аз барқ маҳрум карда мешаванд. Масъулоне, ки ин фармонро иҷро намекунанд, то ба дараҷаи аз вазифа сабукдуш шудан ҷазо мегиранд.                   Хотиррасон менамоем, ки дар ширкат телефони боварӣ, рақамҳояш 295-307; 295-480, ташкил дода шудааст. Ҳар як шаҳрванди кишвар метавонад бо ин телефонҳо бо ёрдамчии раиси ширкат дар тамос шавад ва бобати мушкилоти худ изҳори назар намояд. Ҳангоми телефон кардан зикри маҳали зист, ному насаб ва рақами телефон ҳатмист.