ДАР ҶУМҲУРӢ ЗУКОМИ ХУК БА ҚАЙД ГИРИФТА НАШУДААСТ

                 Душанбе, 5 ноябр. (АМИТ «Ховар», Ибодат Давлатова).- 4 ноябри соли равон дар Хадамоти назорати давлатии санитарӣ-эпидемиологии Вазорати тандурустии Ҷумҳурии Тоҷикистон ҷаласаи нахустини ситод оид ба зукоми нав баргузор гардид.                    Ҷаласаро вазири тандурустии мамлакат Нусратулло Салимов оғоз намуда, ҳозиринро бо ҳолати эпидемиологии мамлакат, вазъи паҳншавии зукоми Н1N1 дар ҷаҳон ошно намуд. Ӯ изҳор дошт, ки барои пешгирии густариши ин вабои аср тамоми чораҳои имконпазирро андешида, корҳои таблиғотӣ ва фаҳмондадиҳиро дар байни мардум ҷоннок ва пурзӯр бояд кард.                  Инчунин, қайд гардид, ки айни замон дар 48 давлатии дунё 52 000 (бо ташхиси озмоишгоҳӣ) ҳодисаи пандемияи зукоми хук ба қайд гирифта шудааст, бе ташхисҳои лабораторӣ зиёда аз 400 000 нафар гирифтори ин вабои аср гаштаанд, ки аз ин миқдор 150 нафар фавтидаанд. Аз кишварҳои ҳамсарҳад дар давлатҳои Қирғизистон, Афғонистон, Чин ин беморӣ ба қайд гирифта шудааст. Дар ҷумҳурии Тоҷикистон то имрӯз ягон нафар бемори зукоми хук ба қайд гирифта нашудааст.                   Дар Ҳукумати Ҷумҳурии Тоҷикистон аз 1 октябри соли ҷорӣ Нақшаи миллии Ҷумҳурии Тоҷикистон оид ба пандемияи зуком тасдиқ гардидааст. Ҳукумати ҷумҳурӣ дар давоми 3 моҳ се ҷаласаи комиссияи фавқулоддаро баргузор намуд. Вазорати тандурустӣ оид ба ташкили чорабиниҳо зидди паҳншавии зукоми хук дар ҳама минтақаҳо ҷаласаҳо ва машваратҳо гузарониданд.                   Бояд қайд намуд, ки моҳи сентябри соли равон дар назди Хадамоти назорати давлатии санитарӣ-эпидемиологӣ ташхисгоҳи вирусологӣ кушода шуд, ки он барои ташхиси муроҷиаткунандагон пурра омода аст.                   Дар маҷлиси ситод қайд гардид, ки дар маводҳо ва дорувориҳои зиддивирусӣ ба наздикӣ аз ҷониби лоиҳаи ҲОУП (HOPE) ба маблағи 1 220 ҳазор сомонӣ дастрас гардида, ба муассисаҳои вазорат тақсим мешаванд.