ДАР КӮЛОБ 8 ГЕКТАР ГАРМХОНА БУНЁД КАРДА ШУДААСТ

                    Кӯлоб, 23 ноябр. (АМИТ «Ховар», Сулаймон Холов).- Бо мақсади самаранок истифода бурдани замин, аз як қитъа рӯёнидани ду се ҳосил ва ба ин васила баланд бардоштани сатҳи зиндагии деҳқонон дар Ҷумҳурии Тоҷикистон як қатор барномаҳои давлатӣ қабул гардида, дар амал татбиқ карда мешаванд. Вазорати кишоварзии мамлакат аз рӯи нақша дар ноҳияҳои кишвар барои парвариши сабзавот ва полезӣ дар ҳамаи фасли сол сохтмони гармхонаҳоро ба нақша гирифтааст. Баҳри татбиқи ин нақша дар ноҳияи Кӯлоб то имрӯз ҳашт гектар гармхонаҳо сохта шуда, кишти зериплёнкагӣ идома дорад.. Ин раванд дар ҷамоъати деҳоти Кӯлоб хуб ба роҳ монда шуда, хоҷагии деҳқонии Луқмони Ҳакими ҷамоати деҳоти мазкур, аллакай майдони гармхонаҳоро ба як гектар расонидааст. Ҳоло деҳқонон картошкаю пиёзи тирамоҳиро корида, ҳосили сабзию шалғам ва дигар анвои сабзавотро ҷамъоварӣ карда истодаанд. Бино бар иттилои раёсати кишоварзии ноҳияи Кӯлоб сохтмони 24 гектар гармхонаҳо дар хоҷагиҳои деҳқонии чор ҷамоати деҳот ба нақша гирифта шудааст, ва он то соли 2011 марҳила ба марҳила амалӣ гардида, фаровонии маҳсулоти хоҷагии қишлоқро тамоми фасли сол дар бозорҳои дохилӣ таъмин хоҳад кард.