ДАСТАИ МУНТАХАБИ ТОҶИКИСТОН ДАР РӮЙХАТИ ФЕДЕРАТСИЯИ БАЙНАЛХАЛҚИИ ФУТБОЛ

                  Душанбе, 23 ноябр. (АМИТ «Ховар», Пайрав Назаров). — Федератсияи байналхалқии футбол 20 ноябр рӯйхати навро дар бораи мавқеъ ва мақоми дастаҳои мунтахаби футболи мамлакатҳои ҷаҳон нашр намуд. Дастаи мунтахаби Тоҷикистон дар рӯйхати мазкур 6 зина боло баромада, дар байни 201 мамлакати ҷаҳон ҷои 162 – юмро ишғол менамояд. Дастаи мунтахаби Тоҷикистон қабл аз ин дар ҷои 168 – ум қарор дошт.                    Футболбозони тоҷик инчунин дар байни дастаҳои футболи қитъаи Осиё мавқеи худро беҳтар намуда, айни ҳол ҷои 33 – юмро ишғол менамояд.                   Дар рӯйхати Федератсияи байналхалқии футбол дастаи мунтахаби Испания ҷои аввалро ишғол мекунад. Қабл аз ин дастаи мунтахаби Бразилия дар ҷои аввал қарор дошт. Дар ҷои сеюми рӯйхати дастаи мунтахаби Голландия қарор дорад.                     Дастаи мунтахаби футболи Русия баъди бохтани бозӣ бо дастаи мунтахаби Словения аз ҷои 22 — юм ба ҷои 24 – ум фуромад. Дастаи мунтахаби Словения дар рӯйхати мазкур 16 зина боло баромада, айни ҳол ҷои 33 – юмро ишғол мекунад.