МУҲОКИМАИ МАСЪАЛАИ ҒАЙРИҚОНУНӢ ПАҲН КАРДАНИ АСЛИҲА

                 Маскав, 20 ноябр. (АМИТ «Ховар», Ҳалима Хушқадамова). — Имрӯз дар шаҳри Маскав машварати намояндагони давлатҳои аъзои Созмони аҳдномаи амнияти дастаҷамъӣ бахшида ба масъалаҳои ҳамоҳанг сохтани мавқеи давлатҳо дар бобати ғайриқонунӣ паҳн намудани аслиҳаи сабуки оташфишон ва комплексҳои сайёри зенитию ракетӣ баргузор мегардад. Дар ин машварат намояндагони вазоратҳои корҳои хориҷӣ ва вазорату идораҳои дигари манфиатдори давлатҳои аъзои СААД ширкат меварзанд.                   Муовини Муншии умумии созмон Ара Бадалиён ба мухбирон гуфт, ки ҳадафи асосии машварат мубодилаи маълумот дар бораи аслиҳаи сабуки оташфишон, комплексҳои сайёри зенитию ракетӣ ва ҳамоҳанг сохтани мавқеи давлатҳои аъзои созмон роҷеъ ба ин проблема мебошад. Муҳокимаи ин масъала барои таҳкими боварии давлатҳо ба ҳамдигар ва таъмини амният дар минтақа аҳамияти калон дорад, гуфт Ара Бадалиён.