МУШКИЛОТ ДАР ҶАМЪОВАРИИ ПАХТА

                   Кӯлоб, 19 ноябр. (АМИТ “Ховар”, Сулаймон Холов).- Хоҷагиҳои деҳқонии минтақаи Кӯлоб дар ҷамъоварии ҳосили пахта ба мушкил рӯ ба рӯ шудаанд. Аҳмад Сафаров, ҷонишини сардори раёсати идораи кишоварзӣ дар минтақаи Кӯлоб мегӯяд, пунбакорони минтақа аз аввали мавсим наздики 50 ҳазор тонна ҳосили пахта ҷамоварӣ намудаанд, ки назар ба ҳамин давраи соли гузашта 10 ҳазор тонна кам мебошад. Ба гуфтаи вай иллати коҳиш ёфтани чиниши пахта дар он аст, ки имсол мувофиқи фармони Раиси ҷумҳур, донишҷӯён барои кӯмаки пунбакорон сафарбар нашуданд ва хоҷагидорон ба танҳоӣ аз ӯҳдаи чиниши пахта намебароянд.                    Аз ин рӯ, мо ба онҳо муроҷиат намудем, то ба хотири сари вақт ҷамъоварии ҳосили пахта, қиммати чиниши онро боло бубаранд, ки мардум ҳавасманд гарданд.                     Ҳоло бошад як килограм пахтаи чиндашуда аз 25 то 30 дирам нарх дорад.