ОРДЕНИ «БАРОИ ХИЗМАТҲОИ БУЗУРГ» БА ЗИЁРАТШО САЪДУЛЛО

                  Душанбе, 26 ноябр. (АМИТ «Ховар», Дилшодаи Ҷонмард).-Шӯрои Марказии созмонҳои мудофиавӣ ва варзиши техникии Иттиҳоди Давлатҳои Мустақил чанд нафар роҳбарону кормандони варзидаро барои хизматҳои шоёнашон дар таҳкими бахши мудофиавӣ, саҳми муносибашон дар тарбияи ҳарбӣ-ватандӯстӣ ва пешрафти созмонҳои мудофиавӣ бо ордену медалҳо сарфароз гардонид.                     Аз ҷумла раиси ноҳияи Нуробод Зиёратшо Саъдулло бо ордени «Барои хизматҳои бузург», ки онро Шӯрои Марказии Иттиҳоди созмонҳои мудофиавӣ ва варзишӣ – техникии Иттиҳоди Давлатҳои Мустақил таъсис намудааст, қадрдонӣ шуд.                    Ордени мазкурро бо ҳуҷҷати тасдиқкунандааш муовини раис – сардори Раёсати молия ва буҷаи Кумитаи Марказии ТҶММ полковник Комилшо Шарифов дар вазъияти тантанавӣ ба раиси ноҳияи Нуробод Зиёратшо Саъдулло супорид.