ПРОКУРАТУРА 106531 СОМОНИРО БА БУҶА БАРГАРДОНД

                 Мӯъминобод, 15 ноябр. (АМИТ «Ховар», Сулаймон Холов).- Прокуратураи ноҳияи Мӯъминобод ҳолати иҷроиши қонунгузории ҷорӣ вобаста ба ғайримақсаднок ишғол кардани замин, худсарона сохтани манзили истиқоматӣ, саркашӣ аз пардохти андоз, фаъолияти кумитаи заминсозӣ ва дигар сохторҳои ҷамъиятиро мавриди санҷиш қарор дод. Сӯҳроб Солеҳов прокурори ноҳия дар бастагӣ ба ин мавзӯъ гуфт, ки дар натиҷаи санҷиш 9 нафар шаҳрвандон оиди вайрон кардани талаботҳои қонун ба ҷавобгарии маъмурӣ кашида шудаанд. Инчунин аз тарафи прокуратураи ноҳия дар ин давра 14 адад қарорҳои раиси ҷамоати Чилдухтарон, 23 фармони раиси хоҷагии деҳқонии «Мӯъминобод», 6 фармони раиси хоҷагии деҳқонии «Навбаҳор» ҷамъ 89 адад фармонҳои раисони хоҷагиҳои деҳқонӣ ва қарорҳои раиси ноҳия эътироз оварда шуд. То инҷониб прокуратураи ноҳия доир ба бақияпулиҳои андоз 40 адад амр тартиб дода, маблағи 106531 сомониро аз ташкилоту муассисаҳо баргардонда ба буҷаи ноҳия ворид сохтааст.