0,50 ГА ЗАМИН — 1600 ДОЛЛАР?

                  Душанбе, 17 декабр. (АМИТ «Ховар», Бекназари Абӯбакр). — Шаҳрванд «И» ба Раёсати Агентии назорати молиявӣ ва мубориза бо коррупсияи ҶТ дар вилояти Хатлон бо ариза муроҷиат намуд, ки раиси хоҷагии деҳқонӣ-фермерии «Раҳмонҷони Хоҷӣ»-и ноҳияи Ҷалолуддини Румӣ Барфаков Маҳмадулло барои додани 0,50 га замини наздиҳавлигӣ воқеъ дар деҳаи «Насос-6»-и ноҳияи мазкур, аввали моҳи майи соли 2009 маблағи 1600 доллари ИМА ва 24 май соли 2009 маблағи 850 сомонии онро гирифта, боз маблағи 2200 доллари ИМА-и дигар талаб кардааст.                   Дар натиҷаи гузаронидани чораҳои фаврӣ-оперативӣ М. Барфаков баъди гирифтани маблағи талабкардаи иловагиаш аз ҷониби кормандони Раёсати Агентӣ дар вилояти Хатлон дастгир карда шуд. Нисбати Барфаков М. бо моддаи 324 қ.2 Кодекси ҷиноии ҶТ парвандаи ҷиноятӣ оғоз карда шуда, тафтишот идома дорад.