ҚАТЪНОМАИ НАВИ СММ

                 Ню-Йорк,19 декабр.(АМИТ «Ховар»-ИТАР-ТАСС).-18 декабр дар маҷлиси Маҷмааи кулли Созмони Милали Муттаҳид дар бораи тақвияти мубориза ба муқобили барқарор гардидани шаклҳои имрӯзаи нажодпарастӣ қатънома қабул гардид. 127 давлати аъзои СММ ба тарафдории қабули қатънома овоз доданд, танҳо намояндаи ИМА ба муқобили он овоз дод.                 Дар қатънома гуфта мешавд, ки паҳн гардидани ғояҳои навбаромад дар заминаи бартарияти нажодӣ ва ташвиқу тарғиби хусумату душманӣ, ҳодисаҳои зуроварӣ ё иғвогарӣ ба чунин зуҳуроти номатлуб бояд дар асоси қонун ҳамчун ҷиноят эътироф намуда, гунаҳкорони он ба ҷавобгарӣ кашида шаванд.                     Дар қатънома вобаста ба идома ёфтани кӯшишҳои хароб намудани ёдгориҳои барои поси хотири онҳое, ки солҳои Ҷанги дуюми ҷахон ба муқобили фашизм мубориза бурдаанд, изҳори ташвиши ҷиддӣ карда мешавад.