КӮМАКИ НАМОЯНДАГИИ ВКД ТОҶИКИСТОН ДАР РУСИЯ БА КОРГАРОНИ МУҲОҶИР

                  Душанбе, 10 декабр. (АМИТ «Ховар», Наталя Михайлова). – Сафоратхонаи Ҷумҳурии Тоҷикистон дар Федератсияи Русия чанде пеш коргари муҳоҷир, сокини 59 – солаи ноҳияи Ҳисор Абдунаим Носировро ба намояндагии вазорати корҳои дохилии Тоҷикистон дар Федератсияи Русия фиристод. А.Носиров дар аризаи ба унвони намояндагии ВКД пешниҳоднамудааш баён намуд, ки ба ӯ ва панҷ нафар ҳамдиёронаш аз моҳи апрел то моҳи ноябри соли 2007 дар ҷои корашон маош надодаанд. Коргари муҳоҷир ва ҳамдиёронаш дар шаҳри Звенигород дар сохтмони биноҳо кор мекарданд.                    Котиби матбуоти намояндагии ВКД Тоҷикистон дар Русия Дилбар Хоҷаева зикр мекунад, ки коргарони муҳоҷири тоҷик бисёр вақт барои рӯёндани музди корашон аз корхонаю муассисаҳо ва соҳибкорони хусусӣ ба намояндагии ВКД муроҷиат мекунанд.                    Баъди дахолати кормандони намояндагии ВКД Тоҷикистон дар Русия ба А.Носиров ва ҳамдиёронаш дар ҷои корашон 20 ҳазор рубли Русия дода шуд.