МАЪРАКАИ ХАЙРИЯ БАРОИ БАЧАГОН

                 Душанбе, 24 декабр. (АМИТ «Ховар», Наталя Михайлова). — Бунёди хайрияи «Сарпараст» ҳамроҳи Ҷунбиши ҷамъиятии «Ваҳдати миллӣ ва эҳёи Тоҷикистон» 27 декабр ба муносибати иди Соли Нав барои панҷ ҳазор нафар тарбиягирандагони мактаб – интернатҳо, хонаҳои бачагон ва фарзандони оилаҳои камбизоати мамлакат дар бинои Филармонияи давлатии ба номи Акашариф Ҷӯраев маъракаи хайрия мегузаронад. Барои бачагон барномаи калони идона тайёр карда шудааст.                 Директори генералии бунёди «Сарпараст» Маҳмудҷон Муродов ба мухбири АМИТ «Ховар» гуфт, ки ба муносибати фаро расидани Соли Нав барои тарбиягирандагони хонаҳои бачагон ва фарзандони хонаводаҳои камбизоат 10 ҳазор тӯҳфаи солинавӣ тайёр карда шуд.                  Бунёди хайрияи «Сарпараст» аз соли 1999 сар карда, ҳар сол барои бачагони эҳтиёҷманд маъракаҳои хайрия ташкил намуда, ба тарбиягирандагони мактаб – интернатҳо ва хонаҳои бачагон кӯмак мерасонад.