МАРКАЗИ ОМӮЗИШИ КӮДАКОН

                   Хоруғ, 7 декабр. (АМИТ «Ховар», Л. Додо).- Дар деҳаи Питоби ноҳияи Шуғнон Маркази омӯзишии кӯдакон расман ифтитоҳ ёфт, ки дар он беш аз 40 нафар кӯдак ба омӯзишу парвариш фаро гирифта шудаанд. Тавре масъулини Донишкадаи такмили маълумоти касбии омӯзгорони вилоят Гулдавлат Бозичаева иттилоъ дод, Бунёди Оғохон дар ҳамбастагӣ бо Хазинаи кӯдакони Созмони Миллали Муттаҳид, мақомоти давлатӣ ва муассисоти омӯзишу парвариш дар ҷумҳурӣ тасмим гирифтааст, ки дар доираи нақшаи омӯзиши кӯдакони давраи томактабӣ дар минтақаҳои кӯҳистони мамлакат марказҳои омӯзиши кӯдаконро таъсис диҳад ва маркази қарияи Питоб нахустгоми ин нақша аст. Ба гуфтаи Г. Бозичаева, ҳоло дар Донишкадаи такмили маълумоти касбӣ ба 29 нафар мураббиён маҳорати кор кардан ба кӯдакон омӯзонида мешавад.