РИШВАСИТОНИИ МУОВИНИ ФИЛИАЛИ БОНК

                  Душанбе, 14 декабр. (АМИТ «Ховар», Бекназари Абӯбакр). — Муовини директори филиали ҶСК «Тоҷиксодиротбонк» дар ноҳияи Фирдавсӣ Муродов Комил Каримович аз ваколатҳои мансабиаш истифода намуда, моҳи марти соли 2008 ҳангоми додани кредит ба маблағи 120 000 сомонӣ, аз шаҳрванд «О» маблағи 24 000 сомонӣ ҳамчун ҳаққи хизмат талаб карда, гирифтааст.                      Ба ҳамин монанд, моҳи июли соли 2008 Муродов К.К. ба шаҳрванд «Х» маблағи 225 000 сомонӣ дода, аз ӯ 22 500 сомонӣ маблағ талаб намуда, гирифтааст. Инчунин, ба шаҳрванд «К» бошад, маблағи зиёда аз 900.000 сомонӣ дода, 29 500 сомонӣ ришва ситонидааст.                    Дар Агентии назорати молиявии давлатӣ ва мубориза бо коррупсия ба мухбири АМИТ «Ховар» иттилоъ доданд, ки нисбати Муродов К.К. аз тарафи Раёсати Агентии назорати давлатии молиявӣ ва мубориза бо коррупсияи ҶТ дар шаҳри Душанбе бо моддаи 295 қ.1 ва 279 қ.4-и Кодекси ҷиноии ҶТ паравндаи ҷиноятӣ оғоз гардида, чораи пешгирӣ дар намуди ҳабс татбиқ карда шуд. Тафтишот идома дорад.