ҚАЛЛОБӢ ОШКОР МЕГАРДАД

                    Душанбе, 5 январ. (АМИТ «Ховар», Лаззат Диловарзод).- Тибқи иттилои шӯъбаи пешгирии Агентии назорати давлатии молиявӣ ва мубориза бо коррупсияи ҷумҳурӣ, раиси хоҷагии деҳқонии «Комил» — и ноҳияи А. Ҷомӣ Сафармурод Аминов бо истифода аз мақоми хизматӣ аз замини хоҷагиаш ба 19 нафар шаҳрвандони ҷамоати деҳоти «Калинин» — и ноҳия ба ивази гирифтани маблағҳои калони пулӣ ғайриқонунӣ замин ҷудо карда додааст. Бино ба маълумоти ҳамин манбаъ, С. Аминов барои ҷудо карда додани замини наздиҳавлигӣ ба миқдори 0,7 га аз 2 нафар шаҳрвандон, ки номашон барои халалдор насохтани тафтишот оварда нашудааст 6 ҳазор доллари амрикоӣ гирифтааст. Нисбати 17 нафари дигар бошад аз тарафи кормандони Агентӣ чораҳои ошкорсозии ҷиноятҳои содиркардаи ӯ идома доранд. Кормандони Агентӣ нисбати С. Аминов бо моддаи 247 қ 3 (қаллобӣ)- и КҶҶТ парвандаи ҷиноӣ оғоз намуданд.Тафтишот идома дорад.