34 НАФАР ШАХСОНИ МАНСАБДОР ҶИНОЯТ СОДИР КАРДАНД

                    Бадахшон, 19 январ. (АМИТ «Ховар», Л. Додо).- Рӯзи 18 январ дар толори Мақомоти маҳаллии ҳокимияти давлатии ВМКБ бо иштироки кормандони Раёсати Агентии назорати молиявӣ ва мубориза бо коррупсияи ВМКБ нишасти матбуотӣ баргузор гардид. Тавре садри раёсат Юсуф Назаршоев иттилоъ дод, дар 131 идораю муассиса тафтишот гузаронида шуд, ки нисбат ба соли 2008 15 адад зиёд аст. Дар натиҷаи тафтишот 2 миллиону 276 941 сомонӣ зарари молиявӣ ошкор гардид. Маблағи рӯйпушшуда 76,6 фоиз ба буҷа дохил гардид.Самти афзалиятноки Раёсат ин пешгирии коррупсия ба ҳисоб меравад. Дар ин самт 77 нафар ба ҷавобгарии интизомӣ кашида шуда, 6 нафар аз кор озод шуданд. Бар асари таҳлил ва омӯзиши ҳодисоти ҷиноятҳои иқтисодӣ дар қаламрави вилоят 40 ҷиноят ба қайд гирифта шудааст, ки нисбат ба соли 2008 11 адад зиёд мебошад. Аз 40 ҷиноят 34-тои он хусусияти коррупсионӣ дошта, аз 2 миллиону 981 ҳазору 365 сомонӣ зарар 2 миллиону 650 ҳазор сомонӣ ҷуброн карда шудааст.