БЕМОРИИ СИЛ ПЕШГИРӢ МЕШАВАД

                   Фархор, 4 январ. (АМИТ «Ховар», Сулаймон Холов).-Дар ноҳияи Фархор бемории сироятии сил пешгирӣ меёбад, гуфт сардухтури маркази бемориҳои зидди сили ноҳия Ҳазратқул Кавгов ва афзуд, ки айни ҳол, дар беморхона 107 нафар муолиҷа гирифта истодаанд, ки аксари онҳо бори аввал ба ин сироят дучор гардидаанд. Ба гуфтаи ин манбаъ 42 бемор аз ҳисоби муҳоҷирони меҳнатӣ, 2 бемор аз ҳисоби шахсони маҳбасгардида ба қайд гирифта шудааст. Шумораи беморон нисбат ба ҳамин давраи соли гузашта 14 нафар афзуда бошад ҳам, бо дастгирии ҳукумати ноҳия ин беморӣ пешгирӣ меёбад, чунки дар давоми як сол аз тарафи ҳукумати ноҳия маблағи 111794 сомонӣ ҷудо гардид, ки ин маблағ барои фароҳам овардани шароити табобати беморон мусоидат намуд. Мавриди зикр аст, ки дар ин самт барномаи ғайридавлатии ДОТС низ саҳмгузорӣ намуда, беморонро бо маводҳои доруворӣ таъмин месозад. Маркази бемориҳои зидди сили ноҳия ба давраи зимистонгузаронӣ омодагии хуб дошта, беморон ба ангишт, ҳезум ва дигар маводи сухт таъмин мебошанд.