ДАР ХАТЛОН РОҲИ ОҲАН САМАРАНОК ИСТИФОДА НАМЕШАВАД

                    Душанбе, (АМИТ «Ховар», Лаззат Диловарзод).- Аз корхонаи воҳиди давлатии «Роҳи оҳани Тоҷикистон» иттилоъ доданд, ки дар давоми 11 моҳи соли 2009 ҳаҷми боркашонии нақлиёти роҳи оҳан нисбат ба соли 2008 34,9 ҳазор тонна зиёд шуда, 13305,7 ҳазор тоннаро ташкил додааст.                     Бо иттилои ҳамин манбаъ, ҳаҷми боркашонӣ дар қитъаҳои КВД «Роҳи оҳани Тоҷикистон» дар давоми 11 моҳи соли 2009 чунин арзёбӣ шудааст: — дар ин муддат тавассути қитъаи роҳи оҳани вилояти Суғд 9901,7 ҳазор тонна ё 74,4 фоизи ҳаҷми умумии боркашонӣ иҷро шуда бошад, тавассути қитъаи роҳи оҳани Душанбе (якҷоя бо ноҳияҳои тобеи ҷумҳурӣ) – 2774,7 ҳазор тонна ё ба андозаи 20,9 фоиз ва дар қитъаи роҳи оҳани вилояти Хатлон – 629,3 ҳазор тонна ё 4,7 фоизи ҳаҷми умумии боркашонӣ иҷро гардидааст, ки он аз натиҷаи самаранок истифода нашудани роҳи оҳан дар ин минтақаи ҷумҳурӣ гувоҳӣ медиҳад,- иброз доштанд дар шӯъбаи ҳамлу нақли боркашонӣ ба мухбири АМИТ «Ховар».