КӮМАКИ ХАЙРИЯ БА ЗАРАРДИДАГОНИ ЗИЛЗИЛА

                  Душанбе, 27 январ. (АМИТ «Ховар», Фарангис Раҳимова). – Намояндагии Бунёди нуфуси Созмони милали муттаҳид дар Тоҷикистон ба аҳолии аз зилзила зарардидаи ноҳияи Ванҷ кӯмаки хайрия мерасонад. Маблағи умумии кӯмаки хайрия 65 ҳазор доллари ИМА – ро ташкил медиҳад.                    Аз ҷумла, ба аҳолии зарардида ва Шифохонаи марказии ноҳияи Ванҷ 500 даста асбобу анҷоми гигиении шустушӯ дода хоҳад шуд, ки аз сачоқу хокаи ҷомашӯӣ, собун, хамираи дандоншӯӣ ва асбобу анҷоми дигари зарурии рӯзгор иборат аст. Инчунин дар байни оилаҳои ноҳия бештар аз 500 кампали гарм тақсим карда мешавад.                     Намояндаи Бунёди нуфуси СММ дар Тоҷикистон Парвиз Бобоев ба мухбири АМИТ «Ховар» хабар дод, ки ба шифохонаи марказии ноҳияи Ванҷ таҷҳизоти гуногуни тиббӣ, инчунин навъҳои гуногуни дору дода хоҳад шуд. Таҷҳизоти мазкур ва доруҳоро барои осону бехтар гардонидани таваллуд истифода мебаранд.                      Бунёди нуфуси СММ ташкилоти байналхалқӣ буда, дар мамлакатҳои гуногун намояндагиҳо дорад. Самтҳои асосии фаъолияти онро ҳалли масъалаҳои рушд, аз ҷумла таъмини баробарҳуқуқии занону мардон, таъмини ҳаёти шоистаи бачагон, саломатии онҳо ва муҳайё сохтани имкониятҳои баробар барои пешрафти ҷомеа ташкил медиҳанд.