КИҲО БЕҲТАРИН АНДОЗСУПОРАНДАГОНАНД?

                 Душанбе, 20 январ. (АМИТ «Ховар», Дилшодаи Ҷонмард).- Имрӯз дар Кумитаи андози назди Ҳукумати Ҷумҳурии Тоҷикистон нахустин маротиба дар даврони соҳибистиқлолии Ҷумҳурии Тоҷикистон озмун оид ба андозсупорандаи беҳтарини соли 2009 ҷамъбаст гардид.                   Барои муайян намудани андозсупорандаи беҳтарини сол сифатҳои дар мӯҳлати муқарраршуда пешниҳод намудани эъломияҳо ва дигар ҳисоботи андоз, сифати (дурустии) эъломияҳои пешниҳодшуда, ҳиссаи андозҳо ва дигар пардохтҳои ҳатмӣ дар ҳаҷми умумии даромади солонаи андозсупоранда, сари вақт ва пурра пардохт шудани андозҳо ва дигар пардохтҳои ҳатмии ҳисобшуда, нисбат ба соли гузашта бештар ҳисоб шудани андозҳо ва дигар пардохтҳои ҳатмӣ ба назар гирифта шудан.                    Дар вақти гузоронидани санҷишҳо вобаста ба риояи қoнунгузории андоз маблағҳои ошкоргардида аз меъёрҳои зерин бояд зиёд набошанд;  -барои субъекти соҳибкории хурд-10 ҳазор сомонӣ; — барои субъекти соҳибкории миёна- 30 ҳазор сомонӣ; — барои субъекти соҳибкории калон-100 ҳазор сомонӣ;  Сатҳи дониш ва фарҳанги баланди андозсупории шахсони мансабдор дар рафти обуна ба рӯзномаи «Боҷу хироҷ» низ ба назар гирифта шуд.                     Дар натиҷа ҶСП «Индиго Тоҷикистон», Бонки миллии Тоҷикистон, КММ «Вавилон-Т» ғолиби озмун дониста шуданд.                   Раиси Кумитаи андози назди Хукумати Ҷумҳурии Тоҷикистон Нусратулло Давлатов ғолибони озмуни Беҳтарин андозсупорандагони сол — ҶСП «Индиго Тоҷикистон», Бонки миллии Тоҷикистон ва КММ «Вавилон-Т»-ро барои дар ин озмуни масъулиятнок ғолиб омаданашон муборакбод карда, ба онҳо тӯҳфаҳои таъсис намудаи Кумитаи андозро супорид.