КОНИ НАФТУ ГАЗ КОРКАРД МЕШАВАД

                   Шаҳринав, 26 январ. (АМИТ «Ховар», Ҳотам Рабиев)- Мувофиқи созишномаи байнидавлатии Федератсияи Русия ва Ҷумҳурии Тоҷикистон корҳои истихроҷи газ ва маҳсулоти нафтӣ дар мавзеи Сариқамиши ҳудуди ноҳия оғоз гардидааст, — иброз дошт раиси ноҳияи Шаҳринав Раҳматуллои Пӯлод, зимни нишасти матбуотие, ки 26 январ дар мақомоти иҷроияи ҳокимияти давлатии ноҳия баргузор гардид.                      Ҳаҷми маҷмӯи маҳсулоти корхонаҳои саноатии ноҳия дар соли сипаригардида ба 1976, 8 ҳазор сомонӣ расонида шуд, ки ин нисбат ба соли 2008-ум 9,8 фоиз зиёд гардидааст. Тибқи барномаи «Рушди иҷтимоию иқтисодии ноҳияи Шаҳринав дар давраи то соли 2015» як қатор иншооти дар соли гузашта мавриди истифодабарӣ қарор дода шуданд. Биноҳои раёсати молия, суғуртаи давлатӣ, шӯъбаи маориф аз ҷумлаи онҳоянд.                      Дар бораи рушди боғу токпарварӣ сухан ронда, раиси ноҳия зикр кард, ки то соли 2014 дар ҳудуди ноҳия бояд дар масоҳати 630, 3 гектар боғу токзорҳо бунёд карда шавад.                        Айни ҳол кормандони муассисаю ташкилотҳо, хоҷагиҳо, шаҳрвандони саховатманд, хоҷагиҳои деҳқонӣ ба суратҳисоби НБО «Роғун» маоши кори якрӯзаашонро ба маблағи зиёда аз 70 ҳазор сомонӣ гузаронида, беш аз 1 милиону 900 ҳазор сомонӣ саҳмия харидорӣ намуданд.                       Дар ҷараёни нишасти матбуотӣ хабарнигорон аз раиси ноҳия, муовинон, раисони ҷамоатҳо, роҳбарони ташкилоту муассисаҳо ба суолҳои худ ҷавобҳои қаноатбахш дарёфт намуданд.