Ш.ЗУҲУРОВ: ҒАМХОРӢ ДАР ҲАҚҚИ МАЪЮБОН ДАР МАДДИ АВВАЛ АСТ

                     Душанбе, 19 январ. (АМИТ «Ховар», Ибодат Давлатова).- Ғамхорӣ дар ҳаққи маъюбон, пиронсолони барҷомонда, кўдакони ятиму бепарастор ва тарбияи онҳо соли ҳисоботӣ дар маркази таваҷҷўҳи вазорат қарор дошт, зикр намуд дар нишасти матбуотӣ Вазири меҳнат ва ҳифзи иҷтимоии аҳолии Ҷумҳурии Тоҷикистон Шукурҷон Зуҳуров.                       Инчунин, қайд намуд, ки айни замон 1468 нафар (844 нафар мардон ва 614 нафар занҳо) шаҳрвандон дар муассисаҳои иҷтимоии вазорат таълиму тарбия гирифта, зиндагӣ мекунанд , аз онҳо 537 нафарашон кўдакон, 1 нафар иштирокчии ҶБВ, 187 нафар маъюби гурўҳи якум, 586 нафар маъюби гурўҳи дуюм мебошанд, ки се вақт бо хўроки гарм, сару либос, ҷои хоб, хизматрасонии иҷтимоӣ ва тиббӣ таъминанд. Ба онҳо зиёда аз 1070 нафар кормандон хизмат мерасонанд. Теъдоди бошандагон нисбати соли 2008 — 65 нафар афзуд.                        Қобили зикр аст, ки дар соли равон барои муассисаҳои статсионарӣ аз буҷети ҷумҳурӣ 11,4 миллион сомонӣ ҷудо гардидааст, ки нисбати соли гузашта қариб 3,5 миллион сомонӣ ва нисбати соли 2007 — 4,4 миллион сомонӣ зиёд мебошад.                         Дар самти хизматрасонии иҷтимоӣ ба аҳолӣ корҳои назаррас ба анҷом расонида шуданд. Роҳбарии илмӣ-методӣ ба 45 шўъбаҳои ёрии иҷтимоӣ ва 6 марказҳои минтақавии ҷумҳурӣ, ки ба шахсони яккаву танҳо ва эҳтиёҷмандон 30 намуди хизматрасонии иҷтимоӣ мерасонанд, беҳбудӣ ёфт.