СИЁСАТИ ЭКОЛОГИИ ҶТ ДАР САТҲИ ГЛОБАЛӢ

                  Душанбе, 18 январ. (АМИТ «Ховар», Лаззат Диловарзод).- Дар нишасти матбуотие, ки дар Кумитаи ҳифзи муҳити зисти назди Ҳукумати ҶТ доир гардид, раиси кумитаи мазкур Хурсандмурод Зикиров иброз дошт, ки Ҷумҳурии Тоҷикистон сиёсати экологии худро дар сатҳи глобалӣ пеш мебарад. Далели чунин сиёсат баромад ва пешниҳодҳои Президенти кишвар Эмомалӣ Раҳмон дар симпозиумҳои байналмилалӣ оид ба тағйирёбии иқлим дар шаҳрҳои Женева, Копенгаген ва пешниҳодҳо оид ба ҷамбасти панҷсолаи аввали 10 – солагии амалиёти «Об барои ҳаёт» ва бо ин мақсад моҳи июни соли 2010 дар шаҳри Душанбе доир гардидани конфронси байналмилалӣ маҳсуб меёбад.                   Кумита фаъолияти пешбурди сиёсати экологиро дар сатҳи глобалӣ такмил дода, муносибатҳояшро бо ташкилотҳои сиёсӣ ва экологии байналмилалӣ вусъати тоза мебахшад.                    — Кумита Барномаи давлатии экологии ҶТ барои солҳои 2009 – 2019 ва нақша — чорабиниҳо оид ба татбиқи Барномаи давлатии экологиро таҳия намуд, ки бо қарори Ҳукумати ҶТ қабул гардиданд, — иброз дошт раиси кумита ба хабарнигорон.