ҒАЛАБАИ ФУТБОЛБОЗОНИ ТОҶИК

Душанбе,  19  феврал. (АМИТ «Ховар», Пайрав  Назаров). – Дастаи  мунтахаби  футболбозони  Тоҷикистон  дирӯз  дар Шри –Ланка бо  дастаи  мунтахаби  Бангладеш  қувваозмоӣ  карда,  бо  ҳисоби  3 : 1 ғалаба  ба  даст овард. Сармураббии   даста  Пӯлод  Қодиров   аз  ғалабаи  шогирдонаш  изҳори  қаноатмандӣ  намуд. Тавре  ки  маълум  аст,  футболбозони тоҷик  қувваозмоии  нахустинро   дар  доираи  мусобиқаи  байналмилалӣ  барои  ба даст  овардани Ҷоми  имтиёзи  Конфедератсияи  футболи  Осиё  бохта буданд.  П.Қодиров  зикр  намуд, ки   сабаби  нокомии  футболбозони тоҷик дар  қувваозмоии  нахустин  борони  шадид  буд.  Вай  зикр  намуд, ки  футболбозон  ҳамагӣ  як  рӯз  пеш  аз  оғози  мусобиқа ба  Коломбо  омада буданд. Акнун  онҳо  ба  шароити  маҳал  мутобиқ  гардида,   маҳорати  худро  намоиш  медиҳанд. Сармураббии  дастаи  мунтахаби  Шри – Ланка  Муҳаммад  Аминулло низ  ба  маҳорати  футболбозони тоҷик баҳои баланд  дод. Хабар  дода  мешавад, ки  дирӯз  дастаи  мунтахаби  Мянма  низ  дар  мусобиқа  бо  ҳисоби  2 : 1  ғалаба ба  даст  овард. Дар  гурӯҳи  «А»  дастаи  мунтахаби Бирма  пешсаф  мебошад.  20  феврал  дастаҳои  мунтахаби  Тоҷикистону  Мянма  ва Бангладешу Шри – Ланка қувваозмоӣ  хоҳанд  кард.