БАРНОМАИ НАВИ БА ДАСТ ОВАРДАНИ ДАРАҶАИ МАГИСТР

Душанбе,  8 феврал. (АМИТ «Ховар», Фарангис  Раҳимова). – Ҳукумати  Иёлоти  Муттаҳидаи  Амрико  эълон  кард, ки   соли  2010  дар Тоҷикистон Барномаи  алоҳидаи   маълумоти  ҳуқуқӣ  ва  рушд  амалӣ  карда  мешавад. Шаҳрвандони  Тоҷикистон  барои   ба даст  овардани   унвони  илмии   магистр бо  асосҳои  ҳуқуқ  дар  ИМА  шинос  мегарданд. Ҳадафи  барнома  ба  роҳ  андохтани  маданияти  волоияти  қонун  дар  Тоҷикистон бо  роҳи   шиносоии ҳуқуқшиносони тоҷик  бо  системаи  хуқуқии  ИМА  мебошад. Барномаи  мазкурро  Бюрои  мубориза ба  муқобили  маводи  нашъадор  ва ҳифзи  қонуну  тартиботи Департаменти  давлатии ИМА  амалӣ  месозад. Ба  иштирокчиёни  барнома   стипендия  дода хоҳад  шуд. Иштирокчиёни  барнома  бо  намояндагони  мақомоти  ҳифзи  ҳуқуқи  ИМА  ҳамкорӣ  карда,  таҷрибаи онҳоро  меомӯзанд. Мӯҳлати охирини  додани  ариза  барои  иштирок   дар  барномаи  мазкур  23  феврали соли  2010  мебошад.