«ЧАРОҒИ УММАТ» ДАР НОҲИЯИ ВОСЕЪ.

Восеъ, 2 феврал. (АМИТ «Ховар», Сулаймон Холов). — «Шӯъбаи  фарҳанги  ноҳияи  Восеъ  дорои  30  китобхона буда, 117 ҳазору 64  нусха  китоб  дар онҳо  захира   гардидааст», —  гуфт  мудири  шӯъбаи  фарҳанги  ноҳияи  Восеъ  Субҳон Раҷабов  ва  афзуд, ки  «соли  сипаригардида  китобхонаҳои  ноҳия  аз  ҳисоби  идораи  фарҳанги  вилоят бо 514  нусха ва  аз  ҳисоби  мақомоти  иҷроияи  ҳокимияти  давлатии  ноҳия  бо 7440 нусха  китоб  таъмин  шудаанд». Мувофиқи суханони С.Раҷабов  бо ташаббуси соҳибкорони  ноҳия  4 бинои  китобхона  дар  соли  ҷорӣ   сохта  ба  истифода  дода  мешавад.  Дар  назди  шӯъбаи  фарҳанги ноҳия  театр — студияи «Аҷам», гӯруҳҳои  эҷодии   «Сеҳрангез», «Лабханд», дастаи тарона ва рақси «Чашма»,  гӯруҳҳои  оилавии  «Фалаки  Маҳмадсафар»   фаъолият  менамоянд, ки    айни  ҳол   намоишномаҳои  «Чароғи  уммат»  ва  «Тавҳид» — ро  таҳия  мекунанд.