ФУТБОЛБОЗОНИ ТОҶИК БА ТУРКМАНИСТОН МЕРАВАНД

Душанбе,  17  феврал. (АМИТ «Ховар», Пайрав  Назаров). —  Аз  20 то  28  феврал дар  шаҳри  Ашқобод  барои    ба даст  овардани  Ҷоми  Президенти  Туркманистон  мусобиқаи  байналмилалии  футбол баргузор  мегардад. Имсол  дар  ин  мусобиқа   аз  7  мамлакат  8 даста иштирок  хоҳад  кард. Аз  Тоҷикистон  дар  мусобиқаи  мазкур   қаҳрамони  футболи  мамлакат – дастаи  «Вахш» — и  шаҳри  Қӯрғонтеппа  иштирок  менамояд. Дастаҳо  барои  иштирок  дар  мусобиқа   ба ду гурӯҳ  ҷудо  карда  мешаванд. Дастаи  футболбозони  «Вахш» ба  гурӯҳи «А» дохил карда шудааст. Инчунин дастаҳои  «Гандзасар» — и   Арманистон,  дастаи  мунтахаби  Туркия   ва дастаи  футболбозони  «Олтин асир» — и  Ашқобод ба  ҳамин гурӯҳ  шомиланд. Ду  дастае, ки   дар  ин  гурӯҳҳо  ҷои  аввалро  ишғол  менамояд,  дар  қувваозмоии хотимавии  мусобиқа  иштирок  хоҳад  кард. Мухбири  АМИТ «Ховар»  хабар  медиҳад, ки   фонди  мукофоти  мусобиқа  35  ҳазор  доллари  ИМА – ро ташкил  медиҳад. Аз  ин  маблағ  барои  ҷои  аввал  20  ҳазор  доллар,  барои  ҷои дуюм  10  ҳазор  доллар  ва барои  ҷои  сеюм  5  ҳазор  доллар  мукофот  дода  мешавад.