САФАРИ ҲАЙАТИ БЕЛОРУСИЯ БА ТОҶИКИСТОН

Душанбе, 8  феврал. (АМИТ «Ховар»,  Наталя  Михайлова). —  Аз  сафоратхонаи  Ҷумҳурии  Тоҷикистон  дар  Минск ба  АМИТ «Ховар»  хабар  доданд, ки  ҳайати Белорусия таҳти  роҳбарии  муовини  вазири  саноат  Геннадий Свидерский  10  феврал барои  боздиди  чоррӯзаи  корӣ  ба  Тоҷикистон  сафар  хоҳад  кард. Дар бораи  сафари  мазкур   моҳи  ноябри  соли  2009   зимни  сафари  Президенти  Тоҷикистон Эмомалӣ  Раҳмон  ба  Белорусия  ва  мулоқоти ӯ  бо  Президенти  ин  мамлакат  Александр  Лукашенко  паймон  карда шуда буд. Ба  ҳайат  роҳбарон ва  мутахассисони Палатаи савдо  ва  саноати  Белорусия,  ҷамъиятҳои  саҳҳомии  «БелАз»,  Корхонаи тракторсозии  Минск,  корхонаи   мошинсозии  Минск «МАЗ»,  ҷамъиятҳои саҳҳомии «Амкодор», «Лидселмаш», «Оршаагропроммаш», «Лидахлебопродукт», «Лидагропроммаш», «Белагромаш» ва  ғайра  шомиланд. Намояндагони  Белорусия  бо  мақсади   муҳокимаи  масъалаҳои  ҳамкорӣ бо  роҳбарияти  вазоратҳои рушди  иқтисод  ва  савдо,  нақлиёт  ва  алоқа,  энергетика  ва  саноат,   кишоварзӣ,  мақомоти  ҳокимияти  давлатии  шаҳри  Душанбе,  муассисаи   роҳи  оҳани  Тоҷикистон,  шабакаи   барқи   Тоҷикистон, «Ориёнбонк»,  корхонаи  воҳиди  давлатии  «Тоҷикагролизинг»  ва  соҳибкорону  тоҷирон  мулоқотҳо анҷом  хоҳанд  дод. Аз  дафтари  матбуоти  сафоратхонаи  Тоҷикистон  дар  Минск   хабар  доданд, ки  сафари  мазкур  ба  вусъати  ҳамкории  корхонаю  ширкатҳо  ва  хоҷагиҳои  хар  ду  мамлакат  мусоидат  хоҳад  кард.