САЙМИДДИН ДӮСТОВ РАҚИБОНАШРО БА ДЕБАТ ДАЪВАТ МЕКУНАД

Душанбе, 24 феврал. (АМИТ «Ховар», Дилшодаи Ҷонмард).-Саймиддин Дӯстов, номзад ба вакили Маҷлиси намояндагони Маҷлиси Олии Ҷумҳурии Тоҷикистон, аз ҳавзаи Файзобод №11, рақибонаш дар ин ҳавза Акоша Кабиров ва Меъроҷиддин Ҳакимовро ба муколама (дебат)-и озоди телевизионӣ даъват кард. Гуфта мешавад, номбурда  бо пахши як изҳорот   ҷиҳати истифода аз ҳуқуқи қонунгузории кишвар, ки 15 дақиқа вақти телевизионӣ барои пешниҳоди барномаҳои  пешазинтихоботӣ ва муаррифии номзадҳо пешбинӣ кардааст, мехоҳад ҷамъулҷамъ аз се номзад 45 дақиқа барои баргузории дебатҳои телевизионии озод истифода намояд.  «Ин дар ҳолест, ки хеле аз номзадҳои дигар аз вақти ройгони ҷудошуда дар телевизион истифода намекунанд ва  ин амали мо метавонад  дар рушди демократия ва интихоботҳои шаффоф ва демократӣ дар Тоҷикистон як навоварие бошад», — изҳор дошт мавсуф. Саймиддин Дӯстов  мехоҳад бо ин амал  дар интихоботҳои оянда дебатҳои кушодаи телевизиониро, ки дар демократияи кишварҳои ғарб маъмулианд, дар Тоҷикистон низ амалӣ созад. Дар ҳамин ҳол, ӯ ҷавоби расмии номзадҳо, рақибони асосиаш — Меъроҷиддин Ҳакимов ва Акоша Кабировро интизор аст.