ВАРЗИШГАРОНИ ТОҶИК БА ВАНКУВЕР МЕРАВАНД

Душанбе,  2 феврал. январ. (АМИТ «Ховар», Пайрав  Назаров). —  То  оғози  Бозиҳои  21 – уми  зимистонаи   олимпӣ  дар   шаҳри  Ванкувер  ҳамагӣ  10  рӯз  боқӣ  мондааст.  Ҳайати олимпии  Ҷумҳурии  Тоҷикистон   пагоҳ, 3  феврал  ба   шаҳри  Ванкувер  хоҳад  рафт. Аз  Тоҷикистон  дар  Бозиҳои  зимистонаи олимпии  Ванкувер  2  нафар  варзишгар  иштирок  менамояд. Онҳо   лижаронон – Алишер  Қудратови  24 — сола  ва Андрей  Дригини  32 – сола  мебошанд. Ба  ҳайати  Тоҷикистон  инчунин  Ширин  Мамадсафоев,  Баҳрулло  Раҷабалиев,  Муҳаммадшо  Абдуллоев ва  мураббии  варзишгарон  Олег  Провоторов  шомиланд. Кумитаи  иҷроияи  Кумитаи  миллии  олимпии  Ҷумҳурии  Тоҷикистон  қабл  аз  сафари ҳайати  мамлакат  ба  Ванкувер   муайян  менамояд, ки  байрақи  Тоҷикистонро  дар  маросими  ифтитоҳи  бозиҳо  кӣ  ба  майдон  медарорад. Мухбири  АМИТ «Ховар»  ёдовар  мешавад, ки   Тоҷикистон  баъди  ба  даст  овардани  истиқлолияти  давлатии  худ  ду  маротиба  дар  бозиҳои  зимистонаи  олимпӣ — соли  2002   дар   шаҳри Солт – Лейк – Ситии Иёлоти  Муттаҳидаи  Амрико  ва  соли 2006  дар  шаҳри  Турини Италия  иштирок  карда буд.