ЧОРАБИНИИ ТАНТАНАВӢ БАХШИДА БА РӮЗИ МАТБУОТ

Душанбе,  10  март. (АМИТ «Ховар», Ибодат Давлатова).-   11 марти соли ҷорӣ  бахшида ба Рӯзи матбуоти тоҷик бо ташаббуси Вазорати фарҳанги Ҷумҳурии Тоҷикистон ва Иттифоқи журналистони Тоҷикистон дар театри давлатии академии ба номи Абдулқосим Лоҳутӣ маҷлиси тантанавӣ баргузор мегардад. Тавре ба мухбири АМИТ «Ховар» аз Вазорати фарҳанги ҷумҳурӣ иттилоъ доданд,  чорабинии мазкурро  Вазири фарҳанг Мирзошоҳрух Асрорӣ оғоз бахшида, ба гурӯҳи рӯзноманигорон барои беҳтарин силсиламақолаҳо, китобҳои беҳтарин мукофотҳои Вазорати фарҳанг, аз ҷумла — нишони сарисинагии «Аълочии матбуот», «Аълочии фарҳанг» ва ифтихорномаҳо тақдим хоҳад кард.  Инчунин,  дар ин ҷамъомад намоиш ва фурӯши китобҳои нашрнамудаи нашриётҳои тобеи Вазорати фарҳанг доир мегардад.