МАФРӮШ ЗАМИН, КИ ХОР ГАРДӢ…

Душанбе, 26 март. (АМИТ «Ховар», Лаззат Диловарзод).- Бино ба иттилои шӯъбаи пешгирии коррупсия, бо роҳбарии корманди Кумитаи андози назди Ҳукумати ҷумҳурӣ Анвариддин Шарипов, қарорҳои раиси ноҳияи Рӯдакӣ аз 23 – юми октябри соли 2007 ва январи соли 2008 вобаста ба додани замин барои ташкил намудани ҳавзҳои моҳипарварӣ ва бунёди боғ қалбакӣ карда шуда, дар ҳамин замина  Кооперативи бӯстонсарои «Қарияи Қамар» бо номи Аҳмадулло Идиев ташкил карда шудааст. Бо супориши А.Шарипов Аҳмадулло Идиев заминҳоро ба қитъаҳои муайян ҷудо намуда, ба шаҳрвандон мефурӯшад. Давлатхӯҷа Наимов ҳангоми фурӯхтани замини аз Аҳмадулло Идиев    харидааш ва  баҳри пинҳон доштани ҷиноят   иваз кардани 18 ҳазор доллар бо асъори миллӣ  (сомонӣ), ба даст афтод. Ҳоло кормандони тафтишотии Агентии НДМ ва мубориза бо коррупсияи ҷумҳурӣ нисбат ба қаллобони заминфурӯш – мудири Ҷамъияти матлуботи ноҳияи Рӯдакӣ Равшанбой Мӯъминов, директори ҶДММ «Қарияи Қамар» Аҳмадулло Идиев, корманди Кумитаи андози назди Ҳукумати ҷумҳурӣ Анвариддин Шарипов ва шаҳрванд Давлатхӯҷа Наимов бо моддаҳои 274 қ3 ва 340 қ2 – и КҶҶТ парвандаи ҷиноятӣ кушода, тафтишот мебаранд.