МУҲОКИМАИ МАСЪАЛАИ ТАҚВИЯТИ МУБОРИЗА БА МУҚОБИЛИ ИСТЕҲСОЛИ МАВОДИ НАШЪАДОР

Душанбе,  15 март. (АМИТ «Ховар»). —  Муншии  умумии  СММ Пан  Ги  Мун  дар  арафаи  сафараш ба  Русия   изҳор намуд, ки  ният  дорад  масъалаи  истеҳсоли   маводи  нашъадор  дар  Афғонистон  ва  зарари онро  ба  ҷомеа  зимни  мулоқот бо  роҳбарони  Русия ва  мамлакатҳои  Осиёи  Марказӣ  муҳокима  кунад.  Вай  зикр намуд, ки  Русия  дар  бобати  расонидани  кӯмак  ба  ҳукумати  Афғонистон  дар бобати  барҳам додани  истеҳсоли   маводи  нашъадор  нақши  муҳим  мебозад. Аз  ин рӯ  қарор  дода шуд, ки  ин  масъала   ҳамроҳи  роҳбарияти  Русия  ва  мамлакатҳои  Осиёи  Марказӣ  мавриди баррасӣ  қарор  дода шавад. Муншии  умумии  СММ 16 март  барои боздиди дурӯза ба  Русия  меояд. Ба  қавли  Пан  Ги  Мун,  мубориза ба  муқобили  истеҳсоли  маводи  нашъадор  дар  Афғонистон  яке  аз  роҳҳои   асосии  таъмини  сулҳу  субот  дар ин  мамлакат  мебошад. Хабар  дода шуд, ки  Ҳукумати  Афғонистон  бо  созмонҳои байналмилалӣ,  аз  ҷумла,  раёсати  мубориза ба  муқобили  маводи  нашъадор  ва  пешгирии  ҷиноятҳои  СММ  самарабахш  ҳамкорӣ  мекунад. Дар  натиҷа  ҳаҷми  интиқоли  маводи  нашъадор  аз  Афғонистон  ба  мамлакатҳои  дигар   соли гузашта  18  фоиз  кам  шуд. Муншии  умумии  СММ  умедвор  аст, ки  Ҳукумати  Афғонистон  проблемаҳои  парваришу  истеҳсоли  маводи  нашъадор ва  ришвахӯриро  тӯли  солҳои  наздик  ҳал  хоҳад  кард.  Яке  аз   тадбирҳои  барҳам додани  истеҳсоли маводи  нашъадор парвариши   зироатҳои дигар  дар  Афғонистон  мебошад. Мувофиқи  маълумоти  СММ,  айни  ҳол  90  фоизи  маводи  нашъадори  ҷаҳон  дар  Афғонистон  истеҳсол  карда  мешавад ва  Русия аз  ҷиҳати  истеъмоли  маводи  нашъадори  героин  дар  ҷаҳон  ҷои  аввалро  ишғол  мекунад. Дар  маърӯзаи   СММ   гуфта  мешавад, ки  шумораи  нашъамандон  дар  Русия  дар давоми  даҳ соли охир  10  баробар  зиёд  шудааст ва  ҳар  сол  дар  ин  мамлакат то  80  тонна   маводи  нашъадори героин   истеъмол  карда  мешавад. Аз  истеъмоли  маводи  нашъадор  ҳар  сол  дар  Русия  аз  35 то  40  ҳазор нафар  вафот  мекунад. Шӯрои  амнияти  СММ  18  март  вазъияти  Афғонистонро  мавриди баррасӣ  қарор  хоҳад  дод.  Дар  ин  бора намояндаи  махсуси  Муншии  умумии  СММ дар  Афғонистон  Стаффан де  Мистура  дар  маҷлиси  Шӯрои  амният  маърӯза  мекунад.