ПАЁМИ МУНШИИ УМУМИИ СММ ДАР БОРАИ НАВРӮЗ

Душанбе, 16 март. (АМИТ «Ховар», Фарангис  Раҳимова). – Паёми  Муншии  умумии  СММ Пан Ги  Мун  дар  бораи  Рӯзи байналмилалӣ эълон  кардани Наврӯз  дар Маҷмаи  кулли  СММ паҳн  карда  шуд. Дар  паём  гуфта  мешавад, ки  ҳамчун  рӯзи  байналмилалӣ  эътироф  гардидани  Наврӯз  дар  бораи  дарки  бештари аҳамияти  ин  ҷашн  на танҳо  дар  минтақаҳое, ки онро  таҷлил  менамоянд,   балки   дар  саросари  ҷаҳон  шаҳодат  медиҳад. Дар  давоми  ҳазорсолаҳо,  вақте, ки  офтоб  хати устуворо  убур  карда,  нимкураи  шимолиро тарк  менамояд,   фасли  баҳор  оғоз  меёбад.  Халқҳои  Балкан,  ҳавзаи  Баҳри  Сиёҳ, Қафқоз, Осиёи  Марказӣ,  Шарқи  Наздик ва  манотиқи  дигар  бо  омад – омади  Наврӯз  расму  анъанаҳои  қадимаи  худро  ба  ҷо  меоранд. Ин  расму оинҳо – аз  тоза  ва  ранг  кардани   хонаҳо  то  аёдати  дӯстон  ва  кушодани  дастурхони  наврӯзӣ ифодагари  рӯҳияи  бедоршавии табиат   буда,  на танҳо барои  мардуми  минтақаҳои  зикршуда, балки  барои тамоми   халқҳои  сайёра ҳамчун  манбаи  илҳом  хизмат  мекунанд,  гуфта  мешавад  дар  паёми  Муншии  умумии  СММ. Пан  Ги  Мун  ба  муносибати  фаро расидани  Иди  байналмилалии  Наврӯз  изҳори  умед  менамояд, ки  халқҳо  ва  мамлакатҳои  ҷаҳон  дар  заминаи  таърихи  пайдоиш  ва   расму  оинҳои  таҷлили  Наврӯз  роҳи  сулҳ  ва  зиндагии   осоиштаро  пеш  гирифта,  зиндагии  худро бо  қонунҳои табиат  ҳамоҳанг  сохта,  муносибатҳои  мусолиматомезро  дар  саросари  ҷаҳон  қавитар  менамоянд.