ТАДБИРҲОИ ИДОНА БАХШИДА БА НАВРӮЗ

Душанбе,  10 март. (АМИТ «Ховар», Людмила  Дубинина). —  Тавре  хабар  дода шуда буд,   23  феврал  дар  иҷлосияи  64 – уми  Маҷмаи  кулли  СММ  бо  аксарияти овозҳои   иштироккунандагони  иҷлосия таҳти  унвони «Рӯзи  байналмилалии  Наврӯз»  қатънома  қабул  карда  шуд.  Лоиҳаи  қатъномаи  мазкурро  Тоҷикистон  ҳамроҳи  Озарбойҷон,  Афғонистон,  Қазоқистон, Қирғизистон,  Эрон,  Туркманистон ва  Туркия   таҳия  сохта,   ба  муҳокимаи  Маҷмаи  кулли  СММ  пешниҳод  карда буд. Дар  робита  раиси   шаҳри  Душанбе  Маҳмадсаид Убайдуллоев   дар  бораи  гузаронидани  тадбирҳои  идона   бахшида ба  Наврӯз  қарор  қабул  намуд.  Тибқи  қарори  мазкур  аз  21 то  24  март   дар  ноҳияҳои  пойтахт  ҷамъомадҳои  фарҳангии идона гузаронида  мешаванд.  21  март   дар дар  Боғи   наботот  саҳнаи  идонаи   калони  театрӣ   намоиш  дода  мешавад. Ҳамон  рӯз дар  Варзишгоҳи  марказии   шаҳри  Душанбе    мусобиқаи  миллии   гӯштингирӣ  ташкил  карда  хоҳад  шуд. 22  март  таҷлили  Наврӯз  дар  ҳамаи  ноҳияҳою  маҳаллаҳои пойтахт ва  маҳаллаҳои  аҳолинишини  атрофи он давом  мекунад. 23  март  дар  боғҳои  фарҳангу  фароғатии «Дӯстии  халқҳо»,  ба номи С.Айнӣ,  Кӯли  ҷавонон  ва  майдони  назди  Театри  опера  ва балет   консертҳои  эстрадӣ  ва  фолклорӣ  баргузор  мегарданд. Дар  ҷойҳои  серодам  намоиш   ва  фурӯши  маҳсулоти  қаннодӣ  ва   устоҳои  халқӣ  ташкил  карда  мешаванд. 24  март   дар  толори Амфитеатр бо  иштироки   устодони  санъат  ва  ҳаваскорон  консерти  калони  идона  намоиш  дода  мешавад. Дар  ин  бора   сардори  шӯъбаи  фарҳанги  мақомоти  иҷроияи  ҳокимияти  давлатии  шаҳри  Душанбе   Шаҳло  Мӯсоева  ба  АМИТ «Ховар»  хабар  дод.