ҶАҲОНИ ИСЛОМ БА ТАШАББУСИ ЭМОМАЛӢ РАҲМОН АРҶ МЕГУЗОРАД

Душанбе, 5 апрел. (АМИТ «Ховар», Бекназари Абӯбакр). — Дар шаҳри Қундузи Афғонистон ҷаласаи нахустини Бунёди Имоми Аъзам доир гардид, ки дар он зиёда аз 500 нафар, аз ҷумла аъзои парлумон, донишмандони соҳаи Ислом ва олимону муҳаққиқони афғон иштирок намуданд. Дар ҷаласаи мазкур ҳадафҳо ва дурнамои фаъолияти ин бунёд баррасӣ гардида, зикр шуд, ки ташаббуси Президенти Тоҷикистон Эмомалӣ Раҳмон оид ба гиромидошти ҳаёту таълимоти Имоми Аъзам ва баргузории Симпозиуми байналмилалии Абӯҳанифа ва тамаддуни ҷаҳонӣ аз ҷониби ҷаҳони Ислом баҳои баланд гирифт. Дар баробари ин, бузургдошти Ҷалолиддини Румӣ ва Робияи Балхӣ, ки бо баргузории конфронсҳои байналмилалӣ дар Душанбе сурат гирифт, дар самти муаррифии фарҳанг ва тамаддуни форсӣ саҳми муҳим ва арзанда гузошт. Дар Вазорати корҳои хориҷии Тоҷикистон ба мухбири АМИТ «Ховар» иттилоъ доданд, ки дар ин ҷаласа ба консули Ҷумҳурии Тоҷикистон дар шаҳри Қундуз Абулфайзи Ато аз номи Бунёд ба унвони Президенти  ҶТ Эмомалӣ Раҳмон номаи сипос супорида шуд.