ҶАДВАЛИ НАВИ МАВҚЕИ ДАСТАҲОИ ФУТБОЛИ МАМЛАКАТҲОИ ҶАҲОН

Душанбе,  28 апрел. (АМИТ «Ховар», Пайрав  Назаров). – Федератсияи  байналхалқии  футбол  имрӯз  ҷадвали нави  мавқеи  дастаҳои  мунтахаби  футболи  мамлакатҳои  ҷаҳонро  чоп  кард. Аз  рӯи  натиҷаҳои  моҳи  апрел  дастаи  мунтахаби  футболи  Тоҷикистон  5  дараҷа  поин   фуромада,  дар  байни  207   дастаи  мунтахаби  футбол  ҷои  135 – умро  ишғол  намуд. Инчунин   дастаи  мунтахаби  футболи  мамлакати  мо  дар  рӯихати   дастаҳои  мунтахаби  футболи  қитъаи  Осиё  низ  хеле  поин  фуромад. Имрӯз  дастаи  мунтахаби  футболи  Тоҷикистон  дар  байни  46  дастаи  мунтахаби  қитъаи  Осиё  ҷои  22 – умро  ишғол  менамояд. Мухбири  АМИТ «Ховар»  хабар  медиҳад, ки дар  рӯихати  дастаҳои  мунтахаби  футболи  ҷаҳон  баъди  Мусобиқоти  қаҳрамонии  соли  2010  ҷои  аввалро  дастаи  мунтахаби Бразилия,  ҷои  дуюмро  дастаи  мунтахаби  Испания  ва  ҷои  сеюмро  дастаи  мунтахаби Португалия  ишғол  менамоянд.  Дастаҳои  мунтахаби  Голландия,  Италия,  Олмон,  Аргентина,  Англия,  Хорватия  ва  Фаронса  даҳ  ҷои   аввали  ҷадвалро  ишғол  мекунанд. Дастаи  мунтахаби  Русия  дар  ҷои  11 – ум   қарор  дорад.