БА СОЗИШНОМА ТАҒЙИРОТ ВОРИД КАРДА МЕШАВАД

Душанбе, 23 апрел. (АМИТ «Ховар», Лаззат Диловарзод).-  Тибқи созишномаи Ҳукумати Ҷумҳурии Тоҷикистон ва ширкати «Сангоб» -и Ҷумҳурии Исломии Эрон оид ба истифода додани нерӯгоҳи барқи обии «Сангтӯда — 2», ки мебоист моҳи феврали соли 2012 мавриди истифода қарор меёфт, тағйирот дохил карда мешавад. Бино ба гуфти роҳбари намояндагии ширкати «Сангоб» — и Ҷумҳурии Исломии Эрон ҷаноби Саид Аскарӣ, ки пудратчии генералии лоиҳаи мазкур маҳсуб меёбад, бо сабаби аз Ҷумҳурии Ӯзбекистон ба маҳали сохтмонӣ интиқол наёфтани қатораҳои бо таҷҳизот ва масолеҳи сохтмонӣ, ки моли ширкати мазкур буда,  моҳи сеюм нигоҳ дошта мешаванд, ба ҷадвали истифодадиҳии нерӯгоҳи мазкур бе таъсир намонд. Аз ин рӯ ширкат зарур мешуморад, ки бо Ҳукумати Ҷумҳурии Тоҷикистон оид ба дигар кардани  чанд нуқтаи созишнома  тағйирот ворид намояд. Бо вуҷуди ҳамаи мушкилоти дар кори  сохтмон пешомада, агрегати якуми нерӯгоҳ моҳи декабри соли ҷорӣ ба истифода дода мешавад.