МУБОРИЗА ДАР МАЙДОНИ 149 ҲАЗОР ГЕКТАР
Душанбе, 9 апрел. (АМИТ «Ховар», Лаззат Диловарзод).- Соли ҷорӣ ҳам мубориза бар зидди ҳашароти зараррасон, аз ҷумла, малах давом дода мешавад. Мутахассисон дар моҳи март дар майдони 275 ҳазор гектар дар ҷойи эҳтимолии тухмгузории малах мушоҳидаҳо гузарониданд. Натиҷаи мушоҳидаи олимону мутахассисон нишон дод, ки дар майдони 149 ҳазор гектар малах тухм гузоштааст. Бино ба гуфти сардори Муассисаи давлатии муҳофизати растаниҳо ва химикунонии кишоварзӣ Юсуф Муродов, барои муборизаи дастҷамъона бар зидди малах заҳрҳои кимиёвӣ, сӯзишвории дизелӣ, дорупошакҳои дастӣ ва либосҳои муҳофизавӣ зарур аст. Новобаста аз мушкилоти мавҷуда, тамоми чораҳо андешида мешаванд, ки дар давраи якуми инкишофёбӣ, малах ва дигар ҳашароти зараррасон нобуд карда шаванд.