МУЛОҚОТҲОИ Ҳ.ЗАРИФӢ ДАР ЧИН

Душанбе,  29 апрел. (АМИТ «Ховар», Фарангис  Раҳимова). —  Тавре  хабар  дода шуда буд,  вазири  корҳои  хориҷии  Ҷумҳурии  Тоҷикистон  Ҳамрохон  Зарифӣ  имрӯзҳо   дар  Ҷумҳурии  Мардумии  Чин  қарор  дорад.  Ӯ 28  апрел  дар Пекин  бо  муовини  раиси  давлати  Чин  Си Сзипин мулоқот  кард. Зимни  мулоқот  вазъи  имрӯзаи   муносибатҳо ва  ҳамкории  дуҷонибаи  Тоҷикистону  Чин, инчунин  ҳамкории  онҳо  дар  доираи  СҲШ   муҳокима  шуданд. Ҳ.Зарифӣ  дирӯз  инчунин  бо  раиси  Бонки  содироту  воридоти  Чин  Ли Жогу  мулоқот  анҷом  дод.  Зимни  сӯҳбат  ба  фаъолияти  Бонки  мазкур  дар  бобати  амалӣ  сохтани  барномаҳои  муштарак  дар  Тоҷикистон  баҳои  баланд дода шуд. Мухбири  АМИТ «Ховар»  хабар  медиҳад, ки  дар  фарҷоми  мулоқоти  Ҳ.Зарифӣ бо  вазири  корҳои  хориҷии  Чин  Ян  Сзечи  дар  бораи   муқаррар  намудан  ва  қонунӣ  гардонидани   сарҳади  давлатии  ҳар  ду  мамлакат  протоколи  муштарак   имзо  карда шуд. Тоҷикистон ва  Чин  соли  1999  «Дар  бораи  сарҳади давлатии Тоҷикистону  Чин»  созишнома  имзо  карда буданд. Мувофиқи  он  қитъаи  баҳсноки  ағбаи  Карзак пурра  ба  ихтиёри  Тоҷикистон  гузошта,  вале  қариб  200 километри  мураббаъ  қитъаи  наздикии  дарёи Маркансу  ба  ихтиёрни  Чин вогузошта шуд. Моҳи  майи  соли  2002 «Дар  бораи  муқаррар намудани  сарҳад  ва  бартараф  сохтани баҳсҳои  минтақавӣ»  созишномаи  иловагӣ  ба  имзо  расид. Мувофиқи  созишномаи  мазкур,  Тоҷикистон  розӣ  шуд, ки  аз 28  ҳазор  километри  мураббаъ минтақаи  баҳснок   дар  ҳудуди Помири  шарқӣ   1000  километри  мураббаъ  ба  ихтиёри  чин  гузошта  шавад. Моҳи  майи  соли  2004  мувофиқи  созишномаи  дигари  ҳукуматҳои  Тоҷикистону  Чин  гузаргоҳи  сарҳадии «Қаросу» дар  сарҳади  Тоҷикистону  Чин  кушода шуд. Ҳамрохон  Зарифӣ  25  апрел  барои боздиди расмӣ ба  Чин  сафар  карда буд, сафари  ӯ  дар  ин  мамлакат  шоми  29  апрел  ба  охир  мерасад.