МУЛОҚОТИ ЗАРИФӢ БО НАМОЯНДАГОНИ ВОЛОМАҚОМИ ХИТОЙ

Душанбе, 29 апрел. (АМИТ «Ховар», Фарангис Раҳимова). — Дирӯз,  28 апрел,  дар шаҳри Пекин мулоқоти Вазири корҳои хориҷии Ҷумҳурии Тоҷикистон Ҳамрохон Зарифӣ бо муовини Раиси Ҷумҳурии Халқии Хитой Си Тсзипин баргузор гардид. Дар оғоз Вазири корҳои хориҷӣ паёми гарми Президенти Ҷумҳурии Тоҷикистон Эмомалӣ Раҳмонро ба Раиси Ҷумҳурии Халқии Хитой Ҳу Тсинтао ва шахсан ба Си Тсзипин расонид. Дар рафти гуфтушунид сатҳи ҳамкориҳои дуҷонибаи Тоҷикистону Хитой ва ҳамкориҳо дар чорчӯби Созмони ҳамкории Шанхай мавриди баррасӣ қарор гирифтанд. Ҷонибҳо ҳамчунин роҳҳои густариши минбаъдаи муносибатҳои мутақобилан судмандро муҳокима намуданд. Ҳамсӯҳбатон инчунин оид ба соири масъалаҳои минтақавию байналмилалӣ, ки мавриди таваҷҷӯҳи тарафҳо мебошанд, мудобилаи афкор намуданд. Дар поён сӯҳбати муовини Раиси Ҷумҳурии Халқии Хитой паёми гарми ҷавобии Раиси Ҷумҳурии Халқии Хитой Ҳу Тсинтао ва худро ба номи Президенти Ҷумҳурии Тоҷикистон расонид. Худи ҳамон рӯз дар бинои Бонки содирот ва воридоти Ҷумҳурии Халқии Хитой мулоқоти Вазир бо Президенти ин Бонк Ли Жогу баргузор гардид. Дар рафти мулоқот ҷонибҳо дар бораи сатҳи ҳамкориҳои ду кишвар дар соҳаи савдо ва иқтисод мубодилаи назар намуда, нақши Бонкро дар роҳандозии лоиҳаҳои муштарак баланд арзёбӣ карданд. Ҳамрохон Зарифӣ ва Ли Жогу ҳамчунин иҷроиши лоиҳаҳои иқтисодиву тиҷоратии Тољикистонро бо иштироки ин Бонк баррасӣ ва муҳокима намуданд. Дар ин бора ба АМИТ «Ховар» аз Вазорати корҳои хориҷӣ хабар доданд.